Устав князя Владимира Святославича о церковных судах
Не ранее 988 г. 1 — Устав кн. Владимира Святославича о церковных судах
Се яз, князь Володимер, поставих церковь святыя Богородица в Киеве и дах церкви той десятину по всей Русской земли в всех градех.
И по сем сгадал есмь с своею княгинею с Анною и с своими детьми, оже сих судов не подобно судити князю, ни бояром, ни судиям их, и дах те суды церквам, всем епискупиям по Русской земли.
А по сем не вступатися ни детем моим, ни внучатом, ни всему роду моему до века ни в люди церковныя, ни в суды их, то все дал есмь по всем градом и по погостом и по свободам, где христиане суть: роспусть, смильное, заставанье, пошибенье промежу мужем и женою о животе, в племени или в сватовстве поймутся, ведьство, зелийничьство, уреканье три: бляднею и зельи и еретичеством, зубояжа, отца или матерь бьет сын или дчи, братни ти дети тяжутся о задници, церковная татьба, мертвецы волочать, крест посекуть, или на стенах режуть, скоты или псы и поткы без велики нужи введет, или что неподобно в церкви подеет. Те вся суды церкви даны суть. Князю и бояром и судьям в те суды не лзе вступатися.
То вся дал есмь по первых царев уряженью и по вселенскых святых отец семи съборов великих святитель. Аще кто преобидить наш устав, таковым непрощеным быти от закона божия и огнь себе наследуют.
Иже искони уставлено есть и поручено святым епископиям городскыя и торговый всячьская мерила и спуды и свесы и ставила; от бога тако искони уставлено епископу блюсти безпакости, ни умалити, ни умножити; за все то дата ему слово в день суда великаго, яко и о душех человечьскых.
А се церковные люди: игумен, поп, диакон, и кто в клиросе, черньц, черница, попадия, проскурница, попович, лечец, прощенник, задушный человек, монастыреве, больници, гостиици, странноприимници: то люди церковный, богадельные; митрополит или епископ ведает межю ими суд или обиду, или котора или задница. Аже будет иному человеку с тем речь, то обчий суд.
М. Владимирский - Буданов. Хрестоматия по истории русского права, вып. 1, Киев 1885, стр. 212 – 215.
Белоруссия в эпоху феодализма : сборник документов и материалов : в 3 т. / редкол.: А.П. Азаров, А.М. Карпачев, Е.И. Карнейчик ; сост.: З.Ю. Копыльский и др. ; Ин-т истории АН БССР, Арх. упр. МВД БССР. – Минск : Издательство Академии наук БССР, 1959–.
Т. 1 : С древнейших времен до середины XVII века. – Минск : Издательство Академии наук БССР, 1959. – С. 41–42.
_______________
1 Датируется по содержанию документа.