На якія дадатковыя меры падтрымкі і льготы могуць разлічваць сем’і?
18 мая Прэзідэнт Беларусі падпісаў Указ № 171 «Аб сацыяльнай падтрымцы асобных катэгорый грамадзян», які датычыцца ў тым ліку і сем’яў. На якія дадатковыя меры падтрымкі і льготы цяпер зможа разлічваць «ячэйка грамадства»?
1. Для маці, якія нарадзілі чацвёра і больш дзяцей, перыяды, калі яны не працавалі ў сувязі з доглядам малалетніх дзяцей, будуць залічвацца ў агульны стаж працы для прызначэння пенсіі ў межах 12 гадоў. Зараз яны ўлічваюцца ў межах 9 гадоў.
Такім чынам, максімальны перыяд догляду за дзецьмі, які залічваецца ў агульны стаж для мэт пенсійнага забеспячэння, павялічаны з 9 да 12 гадоў.
Такая норма будзе прымяняцца не толькі падчас першасных прызначэнняў пенсій жанчынам, якія нарадзілі чацвярых і больш дзяцей, але і да пенсій, прызначаных да 1 студзеня 2021 года.
Пенсіі будуць пераразлічвацца з улікам згаданай нормы з першага чысла месяца, наступнага за тым, у якім жанчына звернецца па пераразлік. Пры гэтым у органы па працы, занятасці і сацыяльнай абароне неабходна будзе прадставіць заяву і дакументы, якія пацвярджаюць нараджэнне чацвярых і больш дзяцей і выхаванне іх да 3-гадовага ўзросту (калі такіх дакументаў няма ў матэрыялах пенсійнай справы).
2. Таксама зменшаны страхавы стаж для прызначэння працоўнай пенсіі па ўзросце пасля дасягнення агульнаўстаноўленага пенсійнага ўзросту жанчынам, якія нарадзілі чацвярых дзяцей і выхавалі іх да 8-гадовага ўзросту.
Так, жанчынам, якія нарадзілі чацвярых дзяцей і выхавалі іх да 8-гадовага ўзросту, працоўная пенсія па ўзросце пасля дасягнення агульнаўстаноўленага пенсійнага ўзросту будзе прызначацца пры наяўнасці агульнага стажу не менш за 20 гадоў і страхавога стажу не менш за 10 гадоў.
Нагадаем, што для прызначэння працоўнай пенсіі па ўзросце на агульных падставах патрабуецца наяўнасць страхавога стажу:
- у 2021 годзе – не менш за 18 гадоў;
- у 2022 годзе – не менш за 18 гадоў 6 месяцаў;
- у 2023 годзе – не менш за 19 гадоў;
- у 2024 годзе – не менш за 19 гадоў 6 месяцаў;
- у 2025 годзе – не менш за 20 гадоў.
3. Адрасную сацыяльную дапамогу будуць плаціць даўжэй. Для шматдзетных сем’яў перыяд аказання дзяржаўнай адраснай сацыяльнай дапамогі ў выглядзе штомесячнай сацыяльнай дапамогі павялічваецца з 6 да 12 месяцаў.
Акрамя таго, павялічаны крытэрый патрэбнасці са 100 да 115 працэнтаў бюджэту пражытковага мінімуму (БПМ) у сярэднім на душу насельніцтва для прызначэння такой дапамогі. Сёння памер БПМ у сярэднім на душу насельніцтва складае 246,78 рубля.
Удвая вырасце сацыяльная пенсія бацькам дзяцей-інвалідаў.
Сацыяльная пенсія маці і (або) бацьку дзяцей-інвалідаў ва ўзросце да 18 гадоў, якія мелі трэцюю і (або) чацвёртую ступень страты здароўя, прызнаных пасля інвалідамі з дзяцінства І групы, калі бацькі ажыццяўлялі догляд за імі не менш за 20 гадоў, будзе прызначацца ў памеры 130 % бюджэту пражытковага мінімуму пенсіянера.
У маі 2020 года сацыяльная пенсія ў бацькоў дзяцей-інвалідаў склала 123,4 рубля. БПМ пенсіянера складае 187,22 рубля, а 130 % БПМ пенсіянера – 243,4 рубля.
Гэта значыць, памер такой пенсіі вырасце ў два разы і наблізіцца да ўзроўню дапамогі па доглядзе за інвалідам І групы (246,78 руб.) і мінімальнай працоўнай пенсіі па ўзросце (246,85 руб.).
4. З’явіцца адна бясплатная спроба ЭКА.
Шлюбным парам, у якіх абодва сужэнцы з'яўляюцца грамадзянамі Рэспублікі Беларусь і ўзрост жонкі не перавышае 40 гадоў, даецца права на правядзенне адной бясплатнай спробы экстракарпаральнага апладнення (за выключэннем ЭКА з выкарыстаннем донарскіх палавых клетак) пры наяўнасці медыцынскіх паказанняў і адсутнасці супрацьпаказанняў.
Прадугледжаныя новаўвядзенні пачнуць прымяняцца з 1 студзеня 2021 года.
Святлана Бусько, «Звязда», 11 чэрвеня 2020 г.